Fallega Freyja

Freyja er engin smáskepna og hefur gjörbreytt  heimilislífinu á Hóli.  Þau Tommi og Kristín  eru í hundaskóla með hana og hafa tilkynnt mér að ég geti ekki verið með, þetta sé bara  fyrir  foringja  hundsins. Þau Tommi voru farin  út  að ganga kl. 7.30 í morgun á laugardagsmorgni og nú er hún í göngutúr með Begga, Rósu, Týru, Sóleyju systur  og  Kristínu dóttur minni. 

Ég held hún sé bráðskörp og eigi sérlega  auðvelt með að læra - allt annað en að gelta  og  flaðra  og stela öllum þeim mat sem hún heldur  að hún komist upp með að stela.  Um  daginn náði hún stóru osstykki, hálfu smjörstykki og hálfu normalbrauði á hálfri mínútu.  Ég var "hund"pirruð við hana, þar til einhver sagði mér að labrador hundar  éti eins og þeir geti lent í að fá ekki mat í heila viku.  Oftast finnst mér  hún samt yndisleg.

Aftur til fortíðar

Það hefur  verið einkennandi fyrir  undanfarna mánuði að fólk leitar  í gömul gildi, gamaldags mat, prjónaskap og jafnvel gamaldags viðhorf.  Ég veit ekki hvort það  er tilviljun eða regression að gamlt samferðafólk mitt hefur  hóað í alls kyns samkomur. 

Annað kvöld erum  við Tommi að fara að  hitta  starfsfólkið úr  Skíðaskólanum úr Kerlingafjöllum.  Við erum í undirbúningshópnum og höfum verið að skipuleggja  og undirbúa í margar vikur.  Í Fjöllin var ég ráðin fyrir 39 árum og var þar í fjögur  sumur. Þar  kynntist ég Tommsanum mínum, svo þetta  var  örlagaríkur  tími.  Gilbert vinur  okkar  kemur sérstaklega frá  Frakklandi til þess að vera með, Dísa vinkona mín úr Fjöllunum fer með okkur  líka, en ég hef varla spjallað við hana í áratugi.  Skrýtið, spennandi og skemmtilegt.

Í ár verð ég líka 35 ára stúdent og gömlu bekkjarsysturnar eru farnar  að pískra  saman, konur  sem ég hef heldur ekki hitt í áratugi.   Enn önnur tengin við fortíðina eru vinirnir  okkar góðu frá  því í líffræðinni fyrir meira  en 30 árum, en þau hitti ég helst ekki sjaldnar en hálfsmánaðarlega.  Finnst ég öll vera að yngjast eitthvað og lifna.......... 

Fimm til sex kynslóðir í beinan kvenlegg!

Á gömlu myndinni eru langamma mín Kristín, amma Sóley og mamma þegar hún var stelpa ásamt Sigurði Kára Jakobssyni.  Svo erum við nýjustu kynslóðirnar á hinum myndunum, mamma er á þeim öllum

Mér finnst gaman að beita mér.....................

Bara að rifja upp hvernig slegið er inn á  Moggablogginu.   Hef verið að vinna  heima í  dag í friði og ró.  Finnst slíkar  stundir ómetanlegar.  Talaði við Julie Bindel stórfeminista  á  Guardian um forsætisráðherruna okkar í morgun, aldrei að vita hvernig hún matreiðir  það.  Svo fékk ég tækifæri til þess að tala við þjóðina í hádegisfréttunum og lýsti hryggð minni yfir forgangsröðun verkefna í heilbrigðisgeiranum.  Hef ástæðu til  þess að ætla að ráðamenn hafi hlustað og ætli að bregðast við.   Vildi að það gengi eftir og Neyðarmóttakan verði ekki skorin enn frekar niður.  

Á morgun fæ ég tækifæri til þess að leggja inn hjá félagsráðgjafarnemum og sálfræðinemum nokkur atriði um kynbundið ofbeldi.  Lífið er fullt af tækifærum, spurning um að koma auga á þau og nýta þau vel..............

Hálfsakna þess að blogga ekki

Búin að klúðra einhverri stillingu á myndavélinni minni, svo ég næ ekki í myndirnar sem ég tek.   Ef mér tekst að laga það, er aldrei að vita nema ég haldi áfram skrifum mínum hér.  Fannst þetta dálítið skemmtilegt.  Ætla að sjá til

Gleðileg jól

Ágætu vinir og vandamenn.  Álfhólsfréttir óska lesendum sínum gleðilegra og ánægjulegra  hátíða. 

Hér á bæ er allt klárt.  Ég bíð nú eftir gesti mínum sem ég hef eytt með  þorláksmessukvöldi með síðan  ég var  11-12 ára.  Þegar við höfum verið uppistandandi og í sama landsfjórðungi höfum við hittst - ella hringst á.  Þessi gestur er Ásta vinkona og þessi stund er sú hefð sem ég held fastast í.  Oft eru karlarnir okkar  með líka og það er  fínt, en aðalatriðið er að þetta er  okkar  kvöld.  Ég vona að  sem allra  flest okkar  séum farin að njóta aðventunnar í  stað þess að slíta sér  út á  þrifum, saumum og bakstri.   Síðan ég ákvað að ég þyrfti ekki  að gera neitt, geri ég margt - en bara  af því mig langar til  þess,  af því að  ég hef ánægju af því og vil gera það.  Hlakka mikið til aðfangadagskvölds. Hér verða allar mínar dætur, barnabörn og  tengdasynir og rjúpurnar verða hamflettar í fyrramálið.

Ævintýralegi töskumarkaðurinn á Stígamótum í dag og á morgun

Ritstjórn Álfhóls hefur ekki komist á flug um tíma, þrátt fyrir veikburða tilraun. Ristjórnin braut eigin ritstjórnarstefnu og fór að akitera fyrir ýmsu sem Stígamót standa fyrir. Það verður nú gert í síðasta sinn í bili. Svo fer undirrituð að huga að einkalífinu sínu.

 Ævintýralegi töskumarkaðurinn er í dag og á morgun sunnudag kl. 11-18 hjá Stígamótum v. Hlemmtorg

Það er núna um helgina sem þú getur gert ótrúlega góð kaup hjá Stígamótum.   Það er eins konar uppskeruhátíð góðærisins hjá okkur um helgina.  Fleiri þúsund veski og tösku af öllum stærðum og gerðum eru til sölu hjá okkur.  Bæði uppboðstöskur, antiktöskur, merkjavörur, handgerðar töskur, gamlar og snjáðar og risaprúttmarkaður í kjallaranum.    Hverri tösku fylgir skjal um að kaup töskunar hafi styrkt starfsemi Stígamóta.  Starfskonur Stígamóta eru harðákveðnar í að halda úti gæðaþjónustu í kreppunni og það kostar peninga. 

Á uppboðinu má fá töskur gefnar af Björk Guðmundsdóttur, töskuna sem Silvía Nótt var með á Eurovision, tösku með óbirtu jólaljóði Gerðar Kristnýjar, tösku með ljóði eftir Björgu okkar Gísladóttur, tösku með listaverki eftir Körlu, tösku með boði um þrjá magadansa í afmæli þess sem fær töskuna, tösku sem fylgir afmælisterta á afmæli nýja eigandans, vandaða skjalatösku frá Steingrími J, listaverkatöskur eftir Bjargeyju Ingólfsdóttur o.s.frv.  ónotaðar Gucci, Prada o.s.frv. 

Það er bara núna um helgina sem tækifærið býðst og við erum í þessu fallega og þekkta  húsi við Hlemmtorg. 

Farin til Köben að máta mig sem fátækling..........

Þorði ekki annað en að kaupa 2000 dkr. þar sem  kortanotkun ku vera  varasöm.  Keypti krónuna  á 25 kr.  meira  en helmingi meira  en síðast þegar  ég var þar  fyrir mjög stuttu síðan.   Keypti skíðaúlpu fyrir  danska  vinkonu mína hér sem kostar hér 20.000 kr, en hún  greiðir  fyrir hana 8.000.  Er að byrja  að  fatta hvað kreppan þýðir.  Við höfum  verið rænd - eitthvert rosalegasta rán sem ég veit að ein þjóð hefur  orðið fyrir!  Urrrrrrrrrrrrrrrrrrrr

By the way, var  einmitt að lita á  mér augabrýrnar og sparaði þannig 2.900 kr.  og var að heyra að klippikonan mín sem hefur starfað á  sömu stofu í 20 ár er búin að  fá  uppsagnarbréfið. Nú er bara að fara í heimaklippingu líka hjá  henni. Og svo erum við nokkrar komnar í heimalitunarfélag - ekki þó teknar til starfa.  Peningana beint til fólks í kreppunni!

Til hamingju hetjur!

 Já ég veit það að ég er að brjóta ristjórnarstefnuna mína, en það bara ískrar  ennþá í mér  af gleði yfir gærdeginum og ég get ekki annað en birt stórfréttir úr vinnunni minni á Álfhóli. 

Ég vil lyfta upp í sólina konum sem aðrir fjölmiðlar hafa ekki  fattað.  Þær eru svo margfalt merkilegri  en margir af þeim  sem sífellt þreyta mig á opinberu fréttastöðvunum, án þess að mér finnist  þeir hafa margt eða mikilvægt að segja.  Ég mæli með því að Ísland í dag nú eða e.t.v. Kastljósið taki einn þátt eða tvo í að ræða við þær.  Til hamingju elskulegu systur mínar.  

Margrét Steinarsdóttir Jafnréttisviðurkenning Stígamóta árið 2008 Fyrir langt og óeigingjarnt starf í þágu Stígamóta. Fyrir að hafa alla tíð verið boðin og búin til liðsinnis.  Fyrir að hafa oft tekið að sér vandasöm verk eins og lögfræðilega ráðgjöf, fræðslu, peningagæslu, nefndarstörf og ýmislegt fleira. Ekki þó síst fyrir fyndni, greind, þægilega nærveru og órjúfanlega tryggð við starfsemina.      

Kolbrún Halldórsdóttir Jafnréttisviðurkenning Stígamóta árið 2008 Fyrir að hafa flutt mörg mikilvæg þingmál tengd kynbundnu ofbeldi.  Fyrir að hafa þrautseigju og hugrekki til þess að fylgja þeim eftir þrátt fyrir illskiljanlegan mótbyr.  Fyrir að hafa verið óþreytandi ötul í að flytja boðskap og hugmyndafræði Stígamóta inn í þingsal.   Fyrir að hafa tekið að sér ýmis verkefni fyrir Stígamót í baráttunni gegn mansali. Fyrir að vera alltaf í liði með okkur.    

Katrín Anna Guðmundsdóttir Jafnréttisviðurkenning Stígamóta árið 2008 Fyrir að vera óþreytandi talskona feminisma á Íslandi. Fyrir ótal mikilvæga pistla um málefni kynjanna. Fyrir þekkingu, visku og hugrekki.  Fyrir að ganga á undan og teygja mörk hins leyfilega í baráttunni fyrir réttlátara þjóðfélagi og auka þannig rými okkar hinna.   

Matthildur Helgadóttir Jafnréttisviðurkenning Stígamóta árið 2008 Fyrir  að hafa fengið snilldarhugmynd vestur á Ísafirði og hrint henni í framkvæmd með hjálp góðs fólks.   Aðgerðin “Óbeisluð fegurð” hefur vakið verðskuldaða athygli víða um heim og Stígamótakonur eru stoltar af skemmtilegu samstarfi við kvenskörunginn í alþjóðasamhengi.  Fyrir að leggja þung lóð á vogarskálarnar til þess að sýna fram á afkáraleika þröngra staðalímynda kynjanna.  Fyrir að hafa nýtt fyndni og frumlega hugsun sem eru beitt verkfæri í baráttunni fyrir réttlátara samfélagi og vera þannig hvatning fyrir okkur öll.    

Þorgerður Einarsdóttir Jafnréttisviðurkenning Stígamóta árið 2008 Fyrir að gegna ómetanlegu uppeldishlutverki fyrir fræðifólk framtíðarinnar.  Fyrir einstaka þekkingu og færni í að beita hinu mikilvæga verkfæri kynjafræði í baráttunni fyrir réttlátu samfélagi.  Fyrir að hafa verið óþreytandi við að miðla færni sinni til annarra.  Fyrir örlæti, velvilja og hlýju. Fyrir að hafa alltaf veitt stuðning og ráð þegar á hefur þurft að halda.   

Hittumst í dag

1.  Kl. 12.10 fyrir utan Norska sendiráðið við Fjólugötu með fána og í norskum peysum og með kampavín og gleðjumst yfir vitibornu frændfólki okkar í Noregi sem hefur bannað kaup á konum

2. Löbbum svo yfir í Iðnó kl. 13 og hlustum á vísar og klókar konur frá Evrópu segja frá því nýjasta í baráttunni gegn kynferðisofbeldi

3. Tökum þátt í að hylla fimm verðuga viðurkenningarhafa jafnréttisverðlauna Stígamóta sem líka fer fram  í Iðnó kl. 15 og hlustum á undurfallegan söng Önnu Sigríði Helgadóttur.