Frá Westglow

Öfgana á milli

Heima á Íslandi virðist vera yfirvofandi alvarlegri fjármálakreppa en ég ræð við að skilja.  Sjálf er ég akkúrat núna í heimsókn hjá einni af ríkustu konum Bandaríkjanna.  Þessi kona hefur fjármagnað mansalssjóð Equality now! og bauð til sín stjórninni og  okkur tíu fulltrúum samtakanna sem  hlotið hafa viðurkenningar sjóðsins.  Hér eru konur frá Indlandi, Perú, Zambíu, Lettlandi, Brasilíu, Kenýa og hún Guðrún litla frá Kóngsbakka.  Svo eru hér þekktir rithöfundar og kvikmyndagerðarkona ásamt  Gloríu Steinem.  Gloría kom á eftir okkur vegna þess að hún kom fram þennan dag í Ophera þættinum vegna  kosninganna.   Hálfóraunverulegt allt saman. 

Við höldum til heima hjá Bonnie og Jamie sambýliskonu hennar á sveitasetri sem  ég á engin orð til þess að lýsa.  Þær stöllurnar  reka Spa sem  okkur var  boðið í og ég þarf stöðugt að passa  að missa ekki hökuna niður  í bringu.  Einhverra hluta vegna get ég ekki sett inn myndir.

Hér var haldin sérstök sýning á kvikmyndinni Trade sem Equality now! tók þátt í að framleiða.  Um 300 -400 konur mættu á sýninguna og á eftir voru spurningar og svör sem Gloria stjórnaði.  Í pallborði sátum  við þrjár konur og vorum spurðar  spjörunum úr utan úr  sal.  Mín bara róleg og gekk held ég ágætlega. 

Allar héldum við erindi um ástandið í eigin löndum og  það var m.a. skrifuð ályktun um athyglisverða leið íslenskra stjórnvalda gegn klámiðnaði.  Leiðina sem felst í að loka búðunum með konur, nefnilega klámstöðunum.  Skorað var á ísl. stjórnvöld að klára verkið og afnema undanþáguákvæðið.

Ég kom til NY á kosningakvöldið og hitti svo stöllur mínar snemma daginn eftir.  Þær voru almennt æpandi af ánægju með úrslitin og ósofnar eftir kosningavökur.    Allar  ræddu þær  um  að sigurinn væri mun stærri en sem nemur þessum kosningum.   Þetta væri  sigur  grasrótarinnar og mannréttindahreyfinga.   Taina sem er  svört  sagðist vel muna  eftir því þegar hundum var  sigað á svart fólk í hennar  heimaríki og sagðist ekki hafa trúað því að hún myndi upplifa slíka uppreisn æru.  Það er augljóslega mikilvægara hvaða kynþætti kona er af en að vera kona.   

Legg af stað heim í dag í kæfuna og grjónagrautinn og hlakka bara til að hitta fólkið mitt og  komast á landið mitt sem er svoddan ógöngum.

Stolt af Ástu vinkonu minni í Íslandi í dag

Við Ásta vorum saman í bekk og sátum saman frá  því  við vorum 11 ára og þar til við urðum stúdentar. Við höfum velkst í gegnum lífið saman og á milli okkar er leyniþráður.  Við höfum alltaf haldið sambandi og  það er í okkur  innbyggð klukka sem hringir þegar eitthvað er  að hjá  hinni og þegar svo önnur hringir, segir hin  gjarnan, skrýtið,  ég var  að  fara  að hringja. 

Ásta hefur háð  hetjulega baráttu við djöfullegt þunglyndi og haft betur. Hún er nú orðin svo sterk að hún  er farin að nýta  reynslu sína til þess að hvetja aðra í  svipuðum sporum og stappa í þau stálinu.  Í gær kom hún fram í Íslandi í dag og stóð sig eins og alltaf  eins og hetja.

Á vit alþjóðasamfélagsins

Ég er  að fara til North Carolina á morgun  að hitta konurnar frá Equality Now! sem buðu mér  til Nepal í fyrra.  Við ætlum að ræða um mansalsmál og hvernig við best getum  stillt saman strengi.  Á myndinni sem tekin var í fyrra eru m.a. þær  Gloria Steinem og  Bonnie Scheifer ásamt Iluta vinkonu minni frá Lettlandi og ungum konum sem sögðu okkur ólýsanlega sögu sína.  Finnst að vandamál íslensks samfélags séu  ekkert miðað við það sem þær  eru að kljást við. 

Verð ein á hótelherbergi í New York annað kvöld á leiðinni á áfangastað og upplifi forsetakosningarnar í  guðs eigin landi.  Það verður væntanlega einkennileg upplifun. 

 

Gull og demantaleikurinn minn..........

Ég skrifaði um afleggjaraleikinn okkar  Tomma fyrir stuttu.  En ég á fleiri leiki sem e.t.v. gætu verið skemmtilegir  fyrir fleiri um þessar mundir og ég hef aldrei sagt frá.   Gull og  demantaleikurinn hljómar e.t.v eins  og að mig dreymi um veraldleg auðæfi.  Svo er samt ekki.  En þegar mikið gengur á í lífi mínu - og  það er oft - á  ég erfitt með  svefn.  Ég hef reynt ýmislegt til þess að sofna, m.a.  að telja hægt og  rólega sem mér finnst ótrúlega leiðinlegt.   Það dugar þó stundum en til þess að flikka upp á svæfinguna  leik ég mér að  því  að hanna  tölustafina. 

Stundum bý ég til í huganum útsaumaða tölustafi í ýmsum litum og með ýmsum saumaaðferðum.  Stórskemmtilegar og  fljótlegar hannyrðir. Þær einu sem ég  ástunda.  Stafirnir verða hver öðrum fallegri.  Stundum bý ég til tölustafi úr mismunandi villtum blómum.  Þá er  t.d. einn úr  sóleyjum á  fallegu engi, tveir gætu verið búnir til úr  sterkbleikum geldingahnappsbreiðum í svörtum sandi og þrír  úr holtasóleyjum í fallegum móa.  Ég stjórna því gjörsamlega hvernig blómin raða  sér og heillast alveg af fegurðinni. 

Í þessum svæfingaleik hef ég komist að því að ég er  potensial skartgripasmiður.  Ég get hannað svo fallega tölustafi úr gulli, silfri, kopar og hvítagulli að annað eins hefur ekki sést með  berum augum.  Ég  byrjaði þennan leik af mikilli hógværð, en áttaði mig svo á að ég mætti nota allar  þær  gersemar sem mér  detta í  hug.  Ég nota demanta, perlur og  eðalsteina að vild, en er samt hrifnust af hrafntinnu, silfurbergi opal og öðrum steinum sem eru e.t.v. ekki til í alvörunni.  Því miður get ég ekki birt myndir af listaverkunum, þær eru í einkasafninu mínu. 

Afleggjaraleikurinn og fleira ljúft.........

Fyrir helgi var ég með námskeið fyrir starfsfólk Jafnréttisstofu og kíkti í leiðinni við hjá kollegunum hjá Aflinu.  Ég er alltaf jafn ánægð með það þegar  mér tekst að sameina vinnu og einkalíf. Tommi fór með mér og við nutum menningar með Kristínu jafnréttisstýru.  Svo skruppum við í könnunarferð um  Eyjafjörðinn og fórum í afleggjaraleikinn.  Þ.e.a.s. við lékum okkur að því að kanna hvert hinir  og þessir afleggjarar myndu leiða okkur. Við fórum m.a. í Hauganes sem ég vissi varla að væri til, en reyndist myndarþorp. Veit ekki hvernig það hefur  farið gjörsamlega framhjá mér, eins  og það sé bara  nýkomið á  kortið.   Setti líka inn mynd af Hraundranga sem minnir  mig á fallegasta ástarljóð á Íslandi.

Að lokum nýjustu fréttir úr baráttunni við kreppuna.  Hef einhvern veginn  ákveðið að hafa vaðið fyrir  neðan mig. Hef misst allt traust á stjórnvöldum og veit ekki hvar ósköpin munu enda. Keypti því augnabrúnalit sem ég er ekki búin að setja á mig ennþá, en veitir ekki af við nýja svarta hárið. Fæ vonandi hjálp hjá samstarfskonum mínum elskulegum.  Svo keyptum  við hjónin lambaskrokk, nokkuð sem við höfum  ekki gert í tuttugu ár  og toppuðum sjálf okkur.............bjuggum til kæfu úr slögunum!  Hvað verður næst???????????