Enn eitt verkefnið með Rachel vinkonu minni!

Það er athygli vert að stundum þegar ég hef hitt fólk sem hefur átt eftir  að  hafa  mikil áhrif á líf mitt, þá greypist í minni mitt þegar  ég sá það fyrst.  Þannig man ég mjög vel eftir því þegar  ég sá Tomma í fyrsta skipti, ég man meira  að segja líka  hvernig hann var klæddur!  Það sama á við um Rachel vinkonu mína.  Við hittumst fyrst í Bergen 1993  þar sem við vorum  báðar  að halda  innlegg á landsþingi norsku kvennaathvarfahreyfingarinnar.  Ég man hvernig hún  var  klædd og hvað hún  sagði. Hringdi svo til hennar til þess að fara  yfir hugmyndafræðina og við ákváðum að hittast á kaffihúsi í Sandvika og síðan höfum við verið vinkonur. 

Hún er með klárustu, víðsýnustu og best lesnu konum sem ég þekki.  Hún er snillingur í að byggja brýr á milli menningarheima  og á milli kvenna og hópa. Hún hefur kennt mér  meira en nokkur  önnur  um hvað það  þýðir að vera  svört á  Vesturlöndum og hvernig hægt er að yfirvinna menningarárekstra.  Í mörg ár mundi ég þó ekki eftir því að hún væri svört fyrr en hún fór með mér út í Nóatún hverfisverslunina mína að versla.  Þá tók ég eftir því að það snéru sér allir við í búðinni þar sem við vorum.  Með fáum hef ég skemmt mér  betur, hlegið meira og rökrætt lengur. 

Við höfum unnið saman æði mörg verkefni og verið samferða í skoðunum og í alþjóðastarfi.  Við höfum hittst í Kína, í Eystrasaltsríkjunum, í Brighton, í Bandaríkjunum, á Norðurlöndunum og víðar í Evrópu.  Við komum á laggirnar fyrsta kvennaathvarfinu í Eystrasaltsríkjunum, unnum í ENATW og CATW, NKMV og Rachel stýrði Daphneverkefni sem ég hélt utanum á Íslandi.  Ég hef oft haldið fyrirlestra á uppákomum sem hún hefur stýrt og öfugt.  Við erum báðar búnar að gegna nokkrum störfum síðan við hittumst, en alltaf höfum við fundið samstarfsflöt. 

Saman höfum við lent í rosalegum ævintýrum.  Hún var t.d. með mér þegar  ég lenti í slysinu í kolniðamyrkri í Druskininkai og kom mér  á  spítala.  Hún var  með mér  þegar  ég missti glugga með körmum og öllu saman niður af annarri hæð í  nýuppgerðu húsi í London.  Þá hugleiddi hún að stinga af.  Hún var með mér í Svíþjóð þegar ég tók vitlausa kápu í misgripum og það átti að siga á mig lögreglu og hún var  til staðar  þegar ég óvart slengdi úr  fullum kaffibolla yfir formann norska kvenréttindafélagsins í New York sem varð fjúkandi reið. 

Núna er Rachel að stýra  verkefni fyrir Hjálparstofnun kirkjunnar í Noregi.  Verkefnið felst í því að styrkja  og styðja kvennahreyfinguna í Suður  Írak með sérstakri áherslu á baráttuna gegn ofbeldi.  Þangað er ekki óhætt að fara  svo Rachel er staðsett í Amman í  Jórdaníu og hittir konurnar  sínar  í Kuwait.  Í kringum sig hefur  hún  alþjóðlegt teymi fimm sérfræðinga um ofbeldi, þar á meðal mig.  Í nótt er ég að fara til Amman á brainstorming fund vegna verkefnisins.  Elska brainstormingfundi með kláru fólki.  Á meðfylgjandi myndum er Rachel hjá Sþ í New York, í vínsmökkun með einhverri vinkonu sinni og að lokum með íslenskum strák.

Athugasemdir

[Kristín Tómasdóttir (IP-tala skráð) 24.1.2008 kl. 15:00]

En þess á milli, sem þú ert að hitta fólk sem skiptir þig máli, þá mannstu fátt um far og útlit þess??  Þetta styður kenningar Baddeley og Hitch sem hröktu kenningar Atkinsson og Shifferin um að skammtímaminnið væri hlið sem upplýsingar þyrfti að fara í gegnum til þess að komast í langtíma minnið. Baddeley og Hitch hröktu þessa vittleysu eftir að hafa rannsakað fólk með skemmdir á parietal lobe heilans sem  höfðu alvarleg áhrif á skammtíma minni þeirra. Þessir sjúklingar gátu samt lagt nýja atburði á minnið. Ætli þú sért að afsanna þessa gildu kenningu 30 árum eftir að hún var lögð fram? Gæti það verið....

Ég er að fara í próf í hugfræði á morgun. Góða ferð til Amman og til hamingju með ljósbera titilinn- hann fer þér vel. 

Kossar Hryssan sem skrifar frá bókhlöðunni

[Álfhóll, 24.1.2008 kl. 15:20]

Elskulegi sálfræðingurinn minn.  Skil ekki orð af því sem þú varst að  skrifa.  Er  þetta ein af öllum þeim greiningum sem  þú varst búin að setja á  mig, eða er  þetta ný?  Takk fyrir góðar kveðjur og vertu dugleg að lesa.  Heyri í þér í kvöld. Ástarkveðjur. mamma þín

[Edda Agnarsdóttir, 24.1.2008 kl. 18:01]

Til hamingju með ljósberann.

Skemmtileg lesning um Rachel og þig. Góða ferð til Amman.

[Kristín Björk (IP-tala skráð) 25.1.2008 kl. 18:42]

Til hamingju með ljósberatitilinn! 

Dóri var ekki alveg með það á hreinu hvað þessi titill þýddi þegar ég sagði honum að þú hefðir hlotið hann. 

Hann hélt helst að þeir sem væru ljósberar væru þeir sem hlypu með eldinn á Ólympíuleikunum... ég taldi hæpið að þú hefðir verið kosin í slíkt !

[Sóley Tómasdóttir (IP-tala skráð) 26.1.2008 kl. 08:26]

Skulum samt ekki gleyma afreksíþróttaferlinum Kristín Björk. Hindrunarhlaupinu og svona. Er viss um að mamma yrði fínn Ólympíuljósberi. Verður örugglega kosin í það fljótlega. Spurning um að vera öllu viðbúin bara og hafa Fishergallann tiltækan...

[Día (IP-tala skráð) 26.1.2008 kl. 21:38]

góða ferð mín kæra og farið varlega þið vinkonurnar,

Pant koma með til Kína ef þú ætlar að hlaupa með Ólympíueldinn- þarftu ekki einhvern til að hjálpa þér í Fishergallann?

kv Día