Guðný Björk Halldórsdóttir - upprennandi skáldkona

Á Hóli mælum við með útvarpsþættinum Stjörnukíki. Í þættinum er m.a. rætt um barnamenningu og þáttarstjórnendur eru einstaklega smekklegt fólk.  Um daginn var rætt við unga upprennandi skáldkonu, en hún er einmitt ömmustelpan hennar Brynju systur. Guðný Björk sem er níu ára las upp eftir sig sögur og ljóð og sagði frá skrifum sínum.  Alveg yfirveguð og afslöppuð eins og hún væri að spjalla við eldhúsborðið heima hjá sér.  Klár og skemmtileg stelpa sem okkur þykir mikið til koma eins og sjá má á þessari gömlu mynd af henni og Önnsunni minni sem mænir upp á hana á myndinni sem tekin er í  Fljótstungunni góðu þar sem langalangamma þeirra og afi bjuggu á sinni tíð.  Upptökuna má finna á þessari slóð: http://dagskra.ruv.is/streaming/ras1/?file=4358782

I dronningens Köbenhavn

Dekurhelgi okkar vinkvennanna í Kaupmannahöfn er lokið.  Ég veit ekki hvor okkar skemmti sér betur. Við fórum  í bangsaverksmiðju þar sem Hjartagullið mitt valdi sér bangsaham, fyllti hann sjálf með vatti, blés í hann lífi, setti í hann hjarta og góðar óskir og keypti á hann föt.  Ég vil ekki heyra orð um kaupmennsku í þessu sambandi!  Svo fórum við í Tívolí - í öll þau tæki sem okkur datt í hug að fara í. Og Anna valdi alla veitingastaði og veitingar sem við fengum okkur.  Hún keypti sér pulsu á Ráðhústorginu að ráði Begga frænda síns og var sammála honum um að þetta væru bestu pulsur í heimi.  Vinsælustu réttirnir voru annars pizza margarita og tómatsúpa.  Svo fórum við á góða fundi þar sem norrænar vinkonur mínar dáðust að því hversu flott Annsan er. Búnar að vita af henni frá  því ég vissi að hún væri á leiðinni.  Við fórum ekki út úr húsi án þess að hafa gloss. Annsan sat frammí á leiðinni eins og bestu vinkonu sæmir.  Mæli með svona dekurferð fyrir ömmgur. Þetta var  bara dásamlegt.